Евразиялык экономикалык биримдиктин ишкерлер кеңешинин президиумунда «Кыргыз эт» Ассоциациясынын жетекчиси Ырысбек Абдырасулов өз пикирин билдирди.
Ассоциация жетекчиси төмөнкүлөрдү айтты: “Эл аралык эпизоотикалык бюронун маалыматына ылайык, бизде эпизоотикалык абал абдан жакшы, бирок Орусия менен Казакстан тарабынан тыюу салуу дагы деле алына элек, бул Кыргызстандын экономикасына терс таасирин берүүдө”.
Президиумдун жыйыны “Жибек жолундагы экономикалык абалды өнүктүрүү – кызматташтыкты бекемдөө” эл аралык экономикалык форумунун алкагында өттү.
Эпизоотия Кыргызстанда 2007-жылы пайда болгон жана Орусия менен Казакстан тыюу салган. Учурда аткаминерлер абал турукташканын билдирип келишет.
Ы. Абдырасулов белгилегендей, түзүлгөн абалдын натыйжасында эт жана сүт азыктары аткезчилик жол менен ташылууда.
“Бизде азыр лабораториялар заманбап болуп, эл аралык стандарттарга жооп берген жаңы жабдуулар коюлууда. Кыргызстанда ЕАЭБдин стандарттарына ылайык, тоолуу аймактарда 2016-жылдын ноябрь айынан тарта малдарды идентификациялоо иштери жүрүүдө. Учурда 60% иш аткарылды жана 2017-жылдын акырына карата иш бүтөт. ЕАЭБде башка окшош долбоорлор жок. Казакстанда долбоор ишке ашпай калды, Орусияда малды идентификациялоо 2018-жылы башталып, бир нече жылдарга созулмакчы. Бизде лабораторияларды заманбапташтыруу жана малды идентификациялоо талаптарга ылайык жүргүзүлүүдө, бул Кыргызстанга экспортко чыгууга жол ачат”.
ЕАЭБде малды идентификациялоо толугу менен жүрбөгөнүн, ал эми Кыргызстан биринчилерден болуп бардык этаптарды бүтүрөрүн белгилей кетүү керек.
Ал эми экономикалык тыюу салуу качан алынары белгисиз жана жергиликтүү эт өндүрүүчүлөр маселени чечүү үчүн башка жолдорду издеп келишет.
