Кыргызстанда кесиптик билимдин маанилүү экенин түшүнө башташты.
Бул тууралуу Билим берүү жана илим министри Гүлмира Кудайбердиева Чүй облусунун Беловодск айылындагы №28-кесиптик лицейине барган учурда билдирди.
“Учурда кесиптик билим берүүчү 100 окуу жайлары 80 кесип боюнча адистерди даярдайт. Лицейлерде окугандардын саны көбөйө баштады. Коомчулук лицейлерден билим алуу менен аз убакытта эле кесипке ээ болууга жана жакшы маяналуу жумуш табууга мүмкүн экенин түшүнө баштады”,-деди министр.
№28-кесиптик лицейге барган Гүлмира Кудайбердиевага ширеткичтерди окута турган жана алардын тажрыйбасын арттыра турган окуу борборун көрсөтүштү ошондой эле гүл өстүрүү адистиги боюнча айтып беришти.
Министр акыркы 3 жылда 50 кесиптик лицейлер оңдолгонун жана заманбап жабдуулар менен, эмеректер менен камсыз болгонун белгиледи. Учурда 10 окуу жайда оңдоо иштери жүрүп жатканы, аны менен катар эле ден соолугунун мүмкүнчүлүгү чектелгендерге дагы окуу шарттары түзүлүп жатканы айтылды.
Былтыртан баштап Кыргызстанда Тажрыйбаларды өнүктүрүү фонду иштеп баштаган, анын максаты – рынокто талап күч болгон адистерди даярдоо.
Учурда Тажрыйбаларды өнүктүрүү фондуна жумуш берүүчүлөрдөн жана жумуш издөөчүлөрдөн 5000 арыз түшкөн. Алардын арасынан 3096 адам учурда 25 кесип боюнча билим алышууда.
