Жогорку Кеӊеште бүгүн, 13-июнда Эсептөө палатасынын 2017-жылдагы иши жөнүндө маалымат угулуп, депутаттардын басымдуу добушу менен анын төрагасынын отчёту канааттандырарлык деп табылды.
Эсептөө палатасынын төрагасы Улукбек Мариповдун айтымында, Эсептөө палатасы 2017-жылы жалпысынан 2673 аудит объектисине текшерүү жүргүзгөн. Текшерүүлөрдүн жыйынтыгында мамлекеттик мекемелер 11 млрд сомдон ашуун каржы тартибин бузган. Андан тышкары, 2017-жылы жүргүзүлгөн текшерүүлөрдүн натыйжасында 1297 эскертүү жана 79 сунуштама берилген.
“2017-жыл Транспорт жана жол министрлиги 257 млн сом көлөмүндөгү каржы тартибинин бузулушуна жол берген. Ал эми экинчи орундагы Бишкек мэриясында 246 млн сом, үчүнчү орундагы Бажы кызматында 108 млн сом өлчөмүндө каржы тартибин бузуу фактысы аныкталды”,- деди Марипов.
Ал Эсептөө палатасы тарабынан бир жыл ичинде 310 айыл өкмөтүнө текшерүү жүргүзүлүп, 84 млн сомдук каржы тартибин бузуу аныкталып, кылмыш иштери козголгонун кошумчалады.
