Көп убакыттан бери Жергиликтүү өз алдынча башкаруу органдары инфраструктуралык долбоорлорду ишке ашырып келишкени менен кызмат көрсөтүү аксап келет. Муниципалитеттердин ишмердүүлүгү жарандардын кызыкчылыгына төп келиши керек. Карапайым калк болсо бийликтен эч кандай жардам күтпөй калышкандай.
Шаардын же айылдын аймагында көрсөтүлгөн баардык кызматтар жергиликтүү өз алдынча башкаруу системасына кирет. Бул
3 типтеги кызматтар:
1) муниципалдык, 2) чарбалык-өндүрүштүк мүнөздөгү, 3) мамлекет тарабынан берилген ыйгарым укуктарды аткаруу.
Ошондуктан кызматтардын көбү жергиликтүү өз алдынча башкаруу органдарынын катышуусунда жүрөт. Ал эми алардын ролу жана ыйгарым укуктары КРнын Конституциясы жана учурда иштеп жаткан мыйзам аркылуу бекитилген. Ошондой эле мамлекеттик деңгээлде жарандарга кызмат көрсөтүүдө айрым эрежелер аныкталган.
Карапайым калкка эффективүү кызмат көрсөтүү – бул муниципалитеттердин туруктуу өнүгүүсү. Демек, Жергиликтүү өз алдынча башкаруу органдары менен элдин ортосундагы байланыш үзүлбөйт. Бирок Жергиликтүү өз алдынча башкаруу боюнча адис Улар Нарусбаева жергиликтүү өз алдынча башкаруу органдары жакшы кызмат көрсөтүү боюнча иш алып барбай жатканын белгиледи.
Жергиликтүү өз алдынча башкаруу иштери жана этностор аралык мамилелер боюнча мамлекеттик агенттигинин жетекчиси Мурат Байдылдаев Жергиликтүү өз алдынча башкаруу органдарынын мүмкүнчүлүктөрү чектелүү экенин билдирди.
Ал эми эксперттер маселенин келип чыгуу себептерин төмөнкүдөй деп санашат:
Жер-жерлерде калктын”кызмат көрсөтүү” саясатына көп катышпай, көп маани бербегени;
Кызмат көрсөтүү тармагында мыйзамдагы мүчүлүштүктөр;
Каражаттын жетишсиздиги;
“Кызматтарды уюштуруу боюнча стратегиясы бир катар маселелерди чечет. Себеби айыл өкмөтү менен айыл аймагынын жана жарандардын ортосундагы байланышты түзүп, алар бул ишти ишке ашыруудагы бардык этаптарда өздөрү катышышат. Бул сапат, туруктуулук берип, чыгымдарды азайтат”,-деди Дамира Сульпиева.
Жумушчу комиссиянын өкүлдөрү ар кайсы аймактын калкына ар түрдүү кызмат көрсөтүү керектигин аныкташкан. Мисалы, Ысык-Көл облусунда ички жолдорду оңдоо биринчи орунда болсо, Жалал-Абад облусунун жашоочуларын таза суу маселеси түйшөлтөт.
Кызматтарды уюштуруу боюнча стратегияны жер-жерлерде баалап ага карата жакшы пикирин билдиргендер жок эмес.
“Сапаттуу кызмат көрсөтүү жергиликтүү коомдун жашоосун жакшыртат. Карапайым калк жакшы иштердин башталышын дайыма колдоп келет”,-деди Дархан айылынын аксакалы Турусбек ата.
Ирина Байрамукова
