Президент Сооронбай Жээнбеков УКМКнын төрагасы Абдил Сегизбаев, Антикоррупциялык кызматтын директору Сагынбек Исмаилов жана Коопсуздук кеңешинин катчысы Дамир Сагынбаевди кабыл алды. Бул тууралуу өлкө башчынын маалымат кызматы кабарлады.
Алар президентке Коопсуздук кеңешинин 8-февралдагы чечимдерин аткарылышы боюнча маалымат берип, мамлекеттик органдарда коррупцияга каршы күрөштүн жыйынтыктары тууралуу билдиришти.
Учурда резонанс жараткан Бишкек жылуулук электр борборундагы авария жана модернизациялоо иши, республикалык бюджеттен негизи жок кошумча нарк салыгын төлөп берүү фактылары жана башка козголгон кылмыш иштерин иликтөөнүн жүрүшү тууралуу маалымат беришти.
Президент Сооронбай Жээнбеков сот, көзөмөл жана укук коргоо органдарындагы коррупция өлкөнүн улуттук коопсуздугуна негизги коркунуч келтирген абалда калып жаткандыгын белгиледи.
Ошондой эле ал коррупциялык кылмышка тиешеси бар ар бир чиновник мурдагы жетишкендиктерине жана эмгегине карабастан сөзсүз түрдө кылмыш жоопкерчилигине тартылууга тийиш экендигин белгиледи.
