Өлкөдө таза коомду курууга жалпы элдин колдоосу керек. Ансыз бир дагы президент эч кандай өзгөрүү кыла албайт. Мындай пикирин Президент Сооронбай Жээнбеков бүгүн, 10-январда Жумгал районунун коомчулугу менен жолугушууда билдирди.
Жолугушууда коомчулук өкүлдөрү президентке жергиликтүү бийликтин ишиндеги ашыкча бюрократияны кыскартуу, жаңы иш орундарын түзүү, коррупциялык көрүнүштөрдү жоюу, Түндүк-Түштүк жолун куруу, Балыкчы-Кара-Кече темир жол долбоору, каналдарды, сугат тармагын, жол, мектеп, оорукана, балдар бакчасын куруу, жергиликтүү бизнес үчүн жеткиликтүү насыяларды куруу боюнча суроолорду беришти.
Бул суроолорго жооп берген Президент 2018-жыл Аймактарды өнүктүрүү жылы болуп жарыяланганын, анын алкагында көйгөйлөрдү чечүүнүн планы түзүлөөрүн, ал боюнча аймактарды өнүктүрүүгө жана калктын жашоо шартын жакшыртууга багытталган инфратүзүм курулуштары курулуп, ири долбоорлор ишке ашырыларын билдирди. Ошондой эле, Президент Сооронбай Жээнбеков өлкө жарандарын таза коомду курууга катышууга, ал үчүн жоопкерчиликтүү болууга чакырды.
