20-февралда президент Сооронбай Жээнбеков Баткен облусуна жумушчу сапары менен кетти. Бул тууралуу өлкө башчынын маалымат кызматы билдирди.
“Өнүккөн аймак – өнүккөн өлкө. Бул менин президенттик мөөнөтүмдөгү артыкчылыктуу багытым болот. Бул тууралуу өлкө башчы Сооронбай Жээнбеков Баткен облусунун Лейлек району, Исфана, Сүлүктү шаарларынын тургундары менен жолугушууда айтты.
Мамлекет башчы эл менен жолугушууда аймактардын эң ири көйгөйү – социалдык объектилерди куруу, ирригация, таза суу менен камсыз кылуу, жумушчу орундарын түзүү жана айыл чарба продукцияларын өндүрүү экенин белгиледи.
Жээнбеков эн негизгиси бюджеттик, гранттык жана инвестициялык каражатты пландуу, максаттуу пайдалануу керектигин айтты. Ошондой эле, жергиликтүү бийликтин жоопкерчилигин көбөйтүп, алардын иштөөсүнө мүмкүнчүлүк берүү зарылдыгын кошумчалады.
Эске салсак, президент Сооронбай Жээнбеков Баткен облусуна эки күндүк жумушчу сапары менен барган.
