Депутаттар өкмөттүн отчетун угуп, андан ары ЖЭБдеги аварияны иликтөөнү сунуштап жатышат.
Депутаттар тобу Бишкек ЖЭБдеги авария маселесин, ошондой эле аны реконструкциялоого жумшалган 386 млн доллар көлөмүндөгү насыя каражаттын чыгымдалуусун текшерүү маселесин Жогорку Кеӊештин эртеӊ, 31-январда өтө турган жыйынынын күн тартибине киргизүү демилгесин көтөрүүдө. Бул тууралуу Конституциялык мыйзамдар, мамлекеттик түзүлүш, сот-укук маселелери жана ЖК Регламенти боюнча комитеттин кезектеги жыйынынын жүрүшүндө белгилүү болду.
Бишкек ЖЭБдеги аварияны чоӊ кыйроо катары сыпаттаган депутат Исхак Масалиев анын себептерин иликтөө боюнча депутаттык комиссия түзүп, курамына коомчулук өкүлдөрү менен чет өлкөлүк адистерди тартуу зарылдыгын белгиледи. Ал эми депутат Алтынай Өмүрбекова Бишкек ЖЭБин реконструкциялоого жумшалган 386 млн доллар өлчөмүндөгү насыя каражаттын жумшалышына аудит жүргүзүү жана ага саясий баа берүү керектигин кошумчалады.
