Бишкек жылуулук электр борборундагы камералардын ар бири 300 доллардан алынган. Бул тууралуу Улуттук энергохолдинг компаниясынын жетекчиси Айбек Калиев депутаттык комиссиянын 2-апрелдеги отурумунда билдирди.
Анын айтуусунда, жылуулук борборуна 128 даана камера 38 миң 400 долларга алынган. Ал эми калган каражаттарга көзөмөл системасы орнотулуп, 20 чакырымдын тегерегинде байланыш чубалгылары тартылган.
Мындан тышкары, башка шаймандарга коюлган баа аттиштердин баасы катары көрсөтүлгөн. Анткени аттиш деп көрсөтүлгөн кутучанын ичинде 18 шайман, Кыргызстанда сатылбаган резиналар болгон.
Калиевдин айтымында, бул жалпы комплекти котормодо “аттиш” деп жазылып калган.
Эске салсак, Бишкек жылуулук электр боборун модернизациялоонун алкагында сатылып алынган камералардын баасы 14 миң 500 доллар, аттиштердин баасы 600 доллар деп айтылганы коомчулукта катуу сынга алынган.
