17-майда Жогорку Кеңеште Жылуулук электр борборундагы кырдаалды иликтөө боюнча түзүлгөн депутаттык комиссиянын корутундусу талкууланып, жыйынтыкталды.
Жыйындын аягында, депутаттар корутундуга өз сунуштарын киргизишти. Андан соң, депутаттык комиссиянын төрагасы Улан Примов сөз сүйлөдү.
Анын айтымында, тышкы карыздын дээрлик жарымы т.а 44%ы Кытайга туура келет. Кайтаруу мөөнөтүнүн негизги бөлүгү 2024–27-жылдарга туура келет. Бул жылдар аралыгында Кыргыз тарап 200 млн долларды төлөөгө тийиш.
Талкуунун жыйынтыгында, депутаттык комиссиянын корутундусу бир катар сунуштар менен кабыл алынды. Корутундуну отурумга катышкан 112 депутаттын 103ү колдоду. Ал эми бирөө каршы добуш берди.
Токтомдо “Депутаттык комиссиянын корутундусу эске алынсын жана президентке жөнөтүлсүн. ЖЭБ боюнча келишимди даярдаган, иштеп чыккан жана мамлекеттик кабыл алууга катышкан кызматкерлердин иш-аракетине укуктук баа берүү үчүн Башкы прокуратурага жөнөтүлсүн. Башкы прокуратура, УКМК жана Эсеп палатасы үч айлык мөөнөт ичинде Жогорку Кеңешке маалымат берсин” деп жазылды.
Токтомдун аткарылышын парламенттин тиешелүү комитеттери көзөмөлдөйт.
