Депутат Акылбек Жамангулов Бишкек ЖЭБ чыры кийинки мамлекеттик аткаминерлерге сабак болушу керектигин айтып, эл аралык аудиттик компанияга текшерүүгө берүүнү сунуш кылды. Бул тууралуу эл өкүлү парламенттин жалпы жыйынында билдирди.
ЖЭБиндеги аварияга ошол кездеги инженерлер менен техникалык персоналдар жооптуу деген депутат Алмамбет Шыкмаматов Бишкек ЖЭБин модернизациялоо боюнча алынган насыя эки-үч эсе жогорулатылгандыгын айтып, ага кимдер кызыкдар болгондугун тактоо зарыл дейт.
Ал эми депутат Акылбек Жапаров Бишкек ЖЭБин модерназациялоо боюнча алган насыянын кайтарымы жалпысынан 493 млн АКШ доллары экенин, бүгүнкү күндө анын 19 млн АКШ доллары гана төлөнгөндүгүн тактады.
Бир катар депутаттар Бишкек ЖЭБин модернизациялоонун баасы жогору болгондугун айтып, тендер өткөрүү маселеси эмне үчүн каралбагандыгын сурашты. Ошол мезгилдеги Өкмөт башчы Жантөрө Сатыбалдиев ЖЭБди модернизациялоо боюнча тендер өткөрүлсө жакшы болмоктугун, бирок ага убакыт кетерин, компания тандалып отуруп, бүгүнкү күндө ЖЭБди модернизациялоо иши бүтмөк эместигин белгиледи.
