Бишкек жылуулук борборунда болгон кырсыкты Улуттук коопсуздук боюнча мамлекеттик комитети текшерип баштады. Бул тууралуу атайын кызматтын расмий өкүлү Рахат Сулайманов кабарлады.
— «Жылуулук берүүчү борборунда авария болду» деген маалымат чыккандан тартып эле текшерүү иштери башталды. Учурда иликтөө иштери жүрүп жатат. Бул контртеррористтик иш чаралардын алкагында өтүүдө. Ал качан жыйынтыкталса ошондо кенен маалымат беребиз», — деди Сулайманов.
Бирок УКМКнын басма сөз өкүлү эмне болгон контртеррористтик иликтөө экенин кенен айтып берген жок.
26-январда Бишкек жылуулук борбордун эски буу казандарына суу жеткирүүчү жабдыктар бузулуп, «Электр станциялары» ишканасы жылуулук борбордун кубаттуулугун 350 мВттан 154 мВтка чейин түшүргөн. Ушундан улам суунун температурасы 84 градустан 62 ге чейин төмөндөп, борбор калаанын жашоочуларынын үйлөрү муздаган.
Башта «жылуулук борборунда диверсия, атайын жардыруу болду»,- деген маалыматтар тараган. Бирок 27-январда маалымат жыйынында Бишкек жылуулук борбордун директору Нурлан Өмүркул уулу аталган маалыматты төгүнгө чыгарган.
