Чолпон-Ата шаарында Маданият, маалымат жана туризм министрлигинин Департаментинин, ТИМдин, Саламаттыкты сактоо министрлигинин, ИИМдин, ӨКМнын, Ысык-Көл облусундагы ыйгарым укуктуу өкүлчүлүгүнүн кызматкерлеринин жана Кыргызстандын курортторунун ассоциациясынын жетекчилигинин, пансионаттардын жетекчилеринин катышуусунда тегерек стол болуп өттү. Анда Ысык-Көл облусундагы пансионаттардын, ден-соолукту чыңдоочу жайлардын меймандарды кабыл алууга даярдыгы талкууланды.
“2016-жылы эле туризм тармагына тартылган инвестициялардын көлөмү 220 миллион долларга жетти, ал эми туристтик ишкердиктен түшкөн пайда 400 миллион долларга жакын болду. Туруктуу өнүгүү улуттук стратегиясына ылайык, өкмөт алдында турган негизги маселелердин бири – Кыргызстанды Борбордук Азиядагы туристтик борборго айлантуу. Өкмөт бул үчүн инвестицияларды тартуу боюнча бир катар чараларды көрүп, дал ушул максатта тиешелүү иш-чаралар, жарманкелер өткөрүлүүдө. Ошондой эле туристтердин коопсуздугун камсыз кылуу боюнча чаралар каралууда” ‚-деди Вице–премьер–министр Чолпон Султанбекова.
Ошондой эле ал өкмөт өлкө боюнча жол жээктеринде унаа токтотуучу жайлары менен кемпинг борборлор, кофейнялар, туристтик борборлор, дааратканалар жана сувенирлерди саткан чакан дүкөндөр болушу керектиги боюнча тапшырма бергенин баса белгиледи.
Кыргызстандагы курорттор ассоциациясынын жетекчиси Бакыт Молдоналиев болсо башка өлкөлөр менен туристтик бизнес боюнча байланыш түзүү зарылчылыгын белгилеп, чет өлкөлүк туристтерди көп тартуу керек деген пикирин айтты.
“Кыргызстанга туристтерди тартууга дагы бир мүмкүнчүлүк пайда болду. Орусиянын бийлиги барууга коркунуч жараткан эл аралык курорттордун тизмесин көбөйтүүдө. Орусиялыктар Түркияга жана Египетке баруудан көп баш тарта башташты. Ошондуктан меймандар үчүн эс алууну ыңгайлуу кылып берүүгө бардык аракетибизди жумшашыбыз керек, анын үстүнө КРда жаратылыш өтө кооз жана эли меймандос”,-деп санашат иш-чаранын уюштуруучулары.
Транспорт жана жол министрлигинин алдындагы Жол чарба департаментинин отдела №4- аймактык бөлүмүнүн жетекчиси Кудайкул Кучуков министрлик туристтик сезондун ачылышына – 15-июнга чейин Тамчы айылынан Чолпон-Ата шаарына чейинки жолду оңдоп бүтүүнү жана жол белгилерин орнотууну пландаганын билдирди.
Облуста жалпы 165 ден-соолукту чыңдоочу жана эс алуучу жайлар бар, алардын көбү шаардык канализацияга кошулган. Ал эми 78 пансионаттын өздөрүнүн саркынды сууларды тазалоочу жайы бар. Маселе жараткандар «Саамал», «Сосновые рощи», «Кооператор», «Белек» жана «КазГУ»пансионаттары болду, аларды жабуу тууралуу маалымат жөнөтүлдү.
Талантбек Борочоров былтыр 12 пансионатта маселелер жаралганын, алардын бешөөндө маселе чечилгенин белгиледи, ал эми 2 пансионат болсо саркынды сууларды тазалоочу жай кура баштаганын билдирди.
Ал эми Ысык-Көл районунун акими Данир Иманалиев Чолпон-Ата шаарынын канализация системасы эскиргенин мойнуна алды. Бул маселени чечүү үчүн өкмөт аракет кылып жатканы белгилүү болду.
Ал эми туристтин эс алуусу коопсуз болушу үчүн жайкы туристтик сезон учурунда Ысык-Көл облусуна кошумча 700 укук коргоо кызматкери тартыларын, ал эми сезон бүткүчө ИИМдин 3 миң кызматкери иштерин ИИМдин патрулдук милиция башкармалыгынын жетекчисинин орун басары Иманалы Саркулов билдирди.
“Аларда туристтерге керек болгон бардык маалыматтар жазылган. Кооптуу учур жаралса кайда жана кимге кайрылуулары керек экени үч тилде: англис, орус жана кыргыз тилдеринде берилген. Ал жакта тиешелүү жерлердин номерлери дагы жазылган. Брошюралар КРнын чек арасында таратылат”,-деди И. Саркулов.
“Биз ЕАЭБге кирдик жана толук кандуу мүчө катары турфирмалар катышкан тендерлердин баарына катыша алабыз”,-деди Туризм департаментинин жетекчиси Азамат Жаманкулов.
Ирина Байрамукова
