Ушу тапта 298 миӊ бала жөлөпул алууда, эгер бул мыйзам кабыл алынса, алардын саны дагы эки эсеге көбөйөт.
Мыйзам долбоорунда 16 жашка чейинки балдарга “Үй-бүлөгө көмөк” аттуу жөлөкпул каралган. Анда майып балдарга ай сайын берилүүчү социалдык жөлөкпулдун көлөмүн жогорулатуу, ата-эне камкордугунан ажыраган жана мамлекеттин камсыздоосундагы балдарга жеке депозиттик эсептерди ачуу чаралары камтылууда. Бул тууралуу эмгек жана социалдык өнүгүү министри Таалайгүл Исакунова Жогорку Кеӊеште “Кыргыз Республикасынын социалдык коргоо жана жергиликтүү өз алдынча башкаруу чөйрөсүндөгү айрым мыйзам актыларына өзгөртүүлөрдү киргизүү жөнүндө” мыйзам долбоору каралып жатканда билдирди.
Министрдин айтымында, ушу тапта өлкө аймагы боюнча 298 миӊ бала жөлөпул алууда, эгер бул мыйзам кабыл алынса, алардын саны дагы эки эсеге көбөйөт. Ал үчүн бюджеттен 1 млрд 800 миӊ сом талап кылынат. Андан тышкары, балдарга жөлөкпул чектөөдө жакындарынын пенсиясы үй-бүлө кирешесинен чыгарылып салынууда. Эгерде муктаждыгы аныкталса, баланын санына карабастан жөлөкпул бериле берет.
Андан тышкары, жыйын жүрүшүндө Кыргызстандагы жакыр үй-бүлөлөрдүн саны менен минималдуу киреше чеги тууралуу да сөз болду. Эмгек жана социалдык өнүгүү министри Таалайкүл Исакунованын айтымында, Кыргызстандагы жакырчылыктын чеги 2016-жылы 27 пайызды түзсө, 2017-жылдын жыйынтыгында ал 25 пайызга чейин кыскарган. Ал жалпы калктын 0,8 пайызын түзөт.
Ал эми вице-премьер-министр Чолпон Султанбекованын айтымында, жылдык минималдуу киреше чеги 900 сомду түзөт, бирок аны 1421 сомго чейин көбөйтүү сунушу берилүүдө. «Негизи мыйзамдарды башкаруу жана аткаруу жаатында калпыстыктар бар. Ошондуктан, административдик башкаруу чараларын өркүндөтүү зарыл», — дейт ал.
