Документте атаандаштыктын өнүкпөгөнү, азык-түлүктү импорттоо айрым чарба субъекттери тарабынан монополияга туш болгону, атайылап дефицитти түзүп, бааны жогорулатып жатышканы, анын арты менен көп пайда табуу көздөгөн кызыл кулактар бул системада олуттуу көйгөйлөр бар экенинен кабар берери тууралуу жазылган.
Буйрукта рынокто айрым импортчулардын басымдуулук кылып жатканы аларга карата индивидуалдык жеңилдиктер берилгендиктен улам болуп жатканы белгиленип, башка ишкерлик субъекттер рынокко кире албай жатканы жазылган. Бул тармакта түзүлгөн кырдаал ишкерлик активдүүлүктү төмөндөтүп, инвестиция тартууну азайтып жатканы баса белгиленген документте.
Президенттин буйругуна ылайык, 1-февралдан тарта Өзбекстанга азык-түлүк товарларын ташыгандарга карата индивидуалдык бажы жана салык жана башка жеңилдиктер алынып салынат.
Өзбекстандын баардык аймактарында азык-түлүктөрдү сактоочу, кайра иштетүүчү жана таңгактоочу атайын жайлар курулат.
1-февралдан тарта 2002-жылы киргизилген товар-сырьелук биржалардан сатууну же сатып алууну жүргүзүү үчүн дүңүнөн соода кылууга лицензиянын кереги жок болуп калат.
Ал эми кум шекерди өндүрүүчүлөр 2019-жылдын 1-январына чейин кошумча нарк салыгынан бошотулушат.
Башкы прокуратурага болсо башка түзүмдөр менен бирге 2 ай ичинде бажы төлөмдөрүн аныктоо тапшырмасы берилди.
Мындан сырткары чекене сооданы жөнгө салуу, кызмат көрсөтүү, ашыкча тоскоолдуктарды жоюу боюнча мыйзамга анализ жүргүзүлөт.
Атайын бут тосуулар болсо жана бажы процедуралары учурунда кызматынан кыянаттык менен пайдаланышса Мамлекеттик башы комитетинин жетекчилери жеке жоопкерчилик алышмакчы.
