22-февралда Өзбекстандын президенти Шавкат Мирзиёев өлкөдө туризмди өнүктүрүү боюнча жыйын учурунда чет элдик туристтерди каттоону жөнөкөйлөштүрүү тапшырмасын берди. Бул тууралуу өлкө башчысынын басма сөз кызматы билдирди.
Учурдагы 3 күндүн ичинде Өзбекстанга келген туристтер каттоого туруу керек болгон мыйзам алар үчүн ыңгайсыздык жаратып жатканын мамлекет башчысы белгиледи. Ошондой эле ал туристтерди коопсуздугун сактоо укук коргоо органдарынын башкы милдети экенин билдирди.
“Турист ички иштер органдарында жүрбөй саякатташы керек. Эгерде биз туризм тармагында жумушчу орундарды түзгүбүз келсе, анда туристтер үчүн шарт түзүүбүз зарыл”,-деди Шавкат Мирзиёев.
Ошондой эле президент каттоо системасын толугу менен электрондук форматка өткөрүү тапшырмасын берди. Туристтерди каттоо милдети ички иштер органдарына, мейманканаларга, медициналык мекемелерге, жеке үйлөргө, туристтерди кабыл алган физикалык жана юридикалык жактарга берилиши зарылдыгын, ал эми өлкө меймандары бул милдеттен арылышы керектигин билдирди мамлекет башчысы.
1-июлдан тарта Өзбекстанда электрондук визалар киргизилет. Президент электрондук визаларды киргизүү менен катар эле өлкөгө туристтердин келүүсүн жеңилдетүү керектигин билдирди.
Жыйында белгилүү болгондой, 2017-жылы Өзбекстанга 2,7 миллион турист келген, алардын көбү туугандары менен көрүшүүгө жана дарыланууга, соода кылууга, окууга келгендер.
“Өзбекстандын туристтик потенциалы көптөгөн жылдардан бери эффективдүү колдонулбай келген. Туризмди өнүктүрүү үчүн экономикалык жана уюштуруучулук, укуктук шарттар түзүлбөй келген”,-деп жазылат Президенттин басма сөз кызматы тараткан билдирүүдө. Туризм мамлекеттик комитетине туристтердин тартуу тапшырмасы берилди.
