2018-жылдын январь, февраль айлары ичинде Кыргызстанга которулган каражаттын көлөмү 307, 6 млн долларды түздү. Бул тууралуу Улуттук банктын расмий сайтына жарыяланды.
Маалымат боюнча, үстүбүздөгү жылдын февраль айында мигранттар өлкөгө 161,7 миллион доллар которушту. Бул январь айына салыштырмалуу 15,8 млн долларга көп.
Ошол эле учурда, 2017-жылдын декабрь айына салыштырмалуу көрсөткүч 32,6 млн долларга кыскарган.
Кыргызстанга которулган каражаттын басымдуу бөлүгү Орусиядан — 158,6 млн доллар. Алыскы чет өлкөлөрдөн 2,8 млн доллар келген, анын 1,5 млн долларын АКШдагы мигранттар которгон.
Ал эми Кыргызстандан башка мамлекеттерге 35,6 млн доллар каражат жөнөтүлгөн. Анын 90 пайызы Орусияга жиберилген.
2017-жылы мигранттар жалпысынан 2 млрд 482 млн доллар каражат которушкан.
