Улуттук банк Кара-Суу жана Ош шаарларындагы, Талас облусуна караштуу Манас районундагы акча алмаштыруу жайларына 400 миң сом айып салды. Бул тууралуу аталган банктын расмий сайтына жарыяланды.
Маалыматка караганда, Ош жана Кара-Суу шаарларында лицензиясы жок акча алмаштыруу жайын иштеткени үчүн 3 жаранга 100 миң сомдон айып салынды.
Мындан тышкары, Таластагы Манас районунун Новодонецк айылында базарга жакын жердеги акча алмаштыруу жайынын ээси банктык мыйзамдарды бузгандыгы үчүн 100 миң сом айыпка жыгылды.
Акча алмаштыруу жайларында банктык мыйзамдарды бузгандарга карата салына турчу айыптын түрлөрү 2017-жылы бекитилген. Анын көлөмү 10 эсеге жогорулатылган. Улуттук банк муну менен мыйзамсыз иштеген акча алмаштыруу жайларын кыскартууну көздөөдө.
