Улуттук коопсуздук боюнча мамлекеттик комитети Коопсуздук кеңешинин 8-февралдагы чечимине ылайык, кызматтык абал жана экономикалык кылмыштары токтотулган иштерди кайрадан текшерет. Бул тууралуу УКМКнын маалымат кызматы билдирди.
Буга чейин Башкы прокуратура УКМКнын Коррупцияга каршы күрөшүү кызматынан аталган материалдардын мыйзамдуулугун текшерүүнү талап кылган.
Маалыматка ылайык, Коррупцияга каршы күрөшүү кызматы тиешелүү органдар менен бирге 2018-жылдын январынан июнь айына чейин 117 кылмыш ишин козгоп, анын 60ы коррупциялык иштерге байланыштуу болгон. Натыйжада бюджетке 1 млрд 150 млн 545 миң сомдук зыян келтирилгени аныкталган. Анын 95 млн 478 миңи казынага кайра кайтарылды. Ал эми башка кылмыш иштеринен бюджетке 519 млн 220 миң сом зыян келтирилген.
