Улуттук коопсуздук боюнча мамлекеттик комитет Бишкек мэриясынын 9 миң сомдон көчөт сатып алуусу боюнча тергөө жүргүзүүдө. Бул тууралуу аталган мекемеден билдиришти.
2018-жылдын 25-апрелинде “Зеленхоз” муниципалдык ишканасынын кызматкерлери тарабынан тамырлары жабык системасы менен ири көлөмдүү көчөттөрдү сатып алуу фактысы боюнча Кылмыш-жаза кодексинин 221−304− 306-беренелери боюнча козголгон кылмыш ишинин негизинде тергөө жүргүзүлүүдө.
Такталган маалымат боюнча, 2017-жылы 23-октябрда көчөттөрдүн айрым түрлөрүн 9090 сомдон сатып алуу үчүн «Арт Грин» ЖЧКсы менен келишим түзүлгөн.
Бекитилген бюджеттик пландын негизинде ири көлөмдүү көчөттөрдү сатып алууга май айында 60 млн сом каралган.
2017-жыл аралыгында «Арт Грин» ЖЧКсы менен жалпы суммасы 18 млн 615 миң 980 сомго барабар 4 келишим түзүлгөн.
Мындан сырткары «АГТ Азия» ЖЧКсы менен жалпы суммасы 8 млн 948 миң 816 сомдук 2 келишим жана «Зиар Строй» ЖЧКсы менен 14 млн 481 миң сомдук 6 келишим түзүлгөн.
Учурда кылмыш ишинин алкагында көчөттөрдү сатып алуу фактысы боюнча аудит жүргүзүлүүдө.
