Мамлекеттик Бажы жана Салык кызматтары териден жасалган буюмдарды маркировкалоо долбоорун ишке ашырышат.
Экономика министринин орун басары Баккелди Түмөнбаевдин айтымында, ЕАЭБдин пилоттук долбоорунун алкагында териден жасалган буюмдарды маркировкалоо үчүн бир белги 1 доллар же 70 сом турат.
“2016-жылдын 23-ноябрында Москва шаарында кол коюлган, 2015-жылдын 8-сентябрындагы “Накта териден жасалган кийим предметтери, кийимге тиешелүүлөр жана башка буюмдар” товардык позициясы боюнча товарларды контролдук (идентификациялык) белгилер менен маркировкалоону киргизүү боюнча пилоттук долбоорду 2015–2016-жылдары ишке ашыруу жөнүндө макулдашуунун колдонулуу мөөнөтүн узартуу тууралуу протоколду ратификациялоо жөнүндө” Мыйзамдын долбоору экинчи окууда жактырылды.
Товарларды маркировкалоо боюнча улуттук маалыматтык системаны иштеп чыгууга жалпы 1 млн 268 миң доллар зарыл.
Өлкө бюджетинде мындай иштерге каражат бөлүү каралган эмес, ошондуктан бул нормативдик-укуктук актыларды иштеп чыгууга түрткү болгон.
Маркаларды даярдоо үчүн жакында тендер жарыяланат.
Баккелди Түмөнбаевдин айтымында, ушу тапта накта териден жасалган товарларды маркировкалоочу жабдуулар ЕАЭБ курамына кирген өлкөлөрдүн ичинен Орусия менен Беларуста гана орнотулган, ал эми Кыргызстан, Армения, Казакстан эми гана орнотуу алдында турат.
“ЕАЭБдин алкагында бардык териден жасалган буюмдар атайын белгиленип, анын баасы 1 долларды түзөт. Марка болгон учурда буюмдун жасалышынан баштап, анын акыркы колдонуучуга чейин жеткен аймагын биле алабыз. Башкача айтканда, Кыргызстандан Беларусияга, Орусияга товар жөнөтүлсө ал качан өлкө аймагына киргенин, ким аны сатканын, ким кайра сатып жатканын билсе болот. Атайын саноочу жабдуулар бар” ‚-деди ал.
Тендерди уткан компания маркаларды даярдап, аларды сатуу менен алек болот. Экономика министрлигинин сунушу менен долбоорду 2018-жылга чейин узартуу пландалууда.
Айта кетсек, долбоор 2015–2016-жылдары эле ишке ашуусу керек болчу, бирок долбоор боюнча макулдашуу 2016-жылдын 12-августунда гана күчүнө кирип учурда накта териден жасалган товарларды маркировкалоочу жабдуулар ЕАЭБ курамына кирген өлкөлөрдүн ичинен Орусия менен Беларусияда гана орнотулган, ал эми Кыргызстан, Армения, Казакстан эми гана орнотуу алдында турат.
