Тогуз-Тородогу башаламандык боюнча тергөө иштери аяктады. Бул тууралуу бүгүн Бишкекте өткөн пресс-конференцияда Ички иштер министринин орун басары Курсан Асанов билдирди.
Анын айтымында, окуяга байланыштуу айрым кызматкерлер иштен алынды. Буга кошумча милиция тараптан бир катар кемчиликтер кеткен.
Эске салсак, 11-апрелде Жалал-Абаддын Тогуз-Торо районунда «Жи Эл Макмал девелопинг» компаниясынын ишмердигине каршы жергиликтүү тургундар нааразылык акциясына чыгышкан. Акция учурунда ишканага таандык, жаңы курулуп жаткан имарат өрттөлгөн. Бул боюнча ИИМ Кылмыш-жаза кодексинин «Ээнбаштык» жана «Бирөөнүн мүлкүн атайын өрттөп жок кылуу» беренелеринин негизинде кылмыш иши козголуп, 15 киши кармалган. Алардын ичинен үч аял “өлкөдөн чыкпоо” жөнүндө тилкат жазуу менен бошотулган. Калган 12 адам №1 тергөө абагына камакка алынган.
