Ушул жылдын 15-майында Отун-энергетикалык комплекс жана жер казынасын пайдалануу боюнча комитетинин отурумунда Кыргыз Республикасынын Жогорку Кеңешинин 2018 жылдын 12 апрелиндеги П №192-VI протоколдук тапшырмасы боюнча өкмөттүн маалыматы угулду. Ага ылайык, 11-март күнү Тогуз-Тородогу башаламандыктын (Жалал-Абаддын Тогуз-Торо районунда «Жи Эл Макмал девелопинг» компаниясынын курулушу бүтө элек имаратынын өрттөлүшү) кесепеттерин жоюу боюнча көрүлүп жаткан иш аракеттер маалымдалды.
КР Өкмөтүнүн алдындагы Өнөр-жай, энергетика жана жер казынасын пайдалануу боюнча мамлекеттик комитетинин төрагасынын орун басары Азиз Сапаралиевдин маалыматында бул окуя боюнча атайын комиссия түзүлүп, иликтөө иштери жүргүзүлүп жатат. Комиссиянын максаты жергиликтүү эл тарабынан коюлган талаптарды иликтөө болууда. КР Ички Иштер министрлигинин берген маалыматтары боюнча окуяга катыштыгы бар делинген жарандар учурда убактылуу кормоочу жайда кармалып, сурак беришүүдө.
