Ушул жылдын январь-февраль айларында ИДПнын көлөмү 59 миллиард сомдон ашып, мурунку жылдын ушул мезгилине салыштырмалуу 2,7 пайызга жогорулады. Бул тууралуу Улуттук статистика комитетинин экономикалык статистика жана улуттук эсептер башкармалыгынын башчысы Эльвира Исенкулова билдирди.
Маалыматка ылайык, “Кумтөр” кен казуу ишканаларын эсепке албаганда, ички дүң продуктунун көлөмү 53 миллиард сомду түзүп, 3,3 пайызга өскөн. Өнөр жай продукцияларынын көлөмү 35 миллиард сомдон ашып, мурунку жылга салыштырмалуу 5,4 пайызга жогорулаган. Ал эми электро энергия, газ, буу жана кондицияланган аба менен камсыздоо 12,7 пайызга көтөрүлгөн.
Белгилүү болгондой, үстүбүздөгү жылдын январында тышкы соода жүгүртүүнүн көлөмү 489 миллионго жакын долларды түзүп, былтыркы жылга караганда 45,3 пайызга жогорулаган. Ошону менен бирге, экспорт 25,6 пайызга, ал эми импорт 52 пайызга өскөн.
