Делегациянын курамына Тажикстандын Эмгек, миграция министрлигинин, Айыл-чарба, Финансы министрлигинин өкүлдөрү киришкен. Иш-сапардын максаты – Молдова Республикасынын PARE +1 деп аталган акча которууларды экономиканы өнүктүрүүгө жумшоо боюнча программасын үйрөнүү. Бул программа 2011-жылдан тарта чакан жана орто ишканаларды өнүктүрүү үчүн ишке ашырылып келет.
Тажикстандын өкмөтү ФАОнун колдоосу менен дал ушундай программаны ишке ашырууну пландоодо. Анын максаты – эмгек мигранттары которгон каражатты айыл-чарбага жана агробизнеске инвестиция катары тартуу. Каалоочулар чакан ишин баштоо үчүн грант алып, окуудан өтө алышат.
“Миграция жана акча которуулар Борбордук Азияда маанилүү роль ойнойт. Молдова аймактагы башка өлкөлөр үчүн мыкты үлгү болууда. Ал эми ФАО болсо туруктуу өнүгүү максаттарына жетүүнү каалаган өлкөлөр үчүн жардамын аябай келет”,-деди ФАОнун экономика жана айыл-чарбаны өнүктүрүү маселелери боюнча бөлүмүнүн жетекчисинин орун басары Марко Санчес.
