«Экономика» гезити аймактардагы аткарылып жаткан иштерди ар квартал сайын окурмандарга жеткирип келет. Бул ирээт Талас облусуна токтолобуз.
Ар бир аймактын өзүнө тиешелүү бренди болот. Ал эми Талас облусунун бренди төө бурчак болуп саналат.
Төө буурчак:
Быйыл төө буурчактын баасы төмөндөп кеткенин жергиликтүү дыйкандар облус жетекчилиги менен болгон жолугушуусунда айтышкан.
Таластык дыйкандардын төө буурчактарынын баасы кытайларга көз каранды.
Талас облусунда төө буурчак сатып алуучу 24 ишкана бар. Дыйкандар жазга карата баасы жогорулайт деп төө буурчакты сактап олтурушат. Бирок жаңы жылдан кийин төө буурчактын баасы ылдыйлап кеткен.
Ушул жылдын 19-апрель күнү төө буурчактын баасынын арзандашынын себептерин билүү максатында Талас областындагы төө буурчак алып жаткан ишканалардын өкүлдөрү чакырылып, негизги себептери айтылган.
Бул фирмалар дагы экспортко өткөргөндө баалары төмөн болуп жатканын айтышты. Ак төө буурчак (лопатка) 43–45 сом болсо, өңдүү төө буурчактар (скороспелка, кызыл чаар) 75 сомдон болууда.
Төө буурчак алуучу фирмалардын өкүлдөрүнүн айтымында, жаңы жылдан кийин эле аларга буйрутмалар токтой баштады. Себеби Кытай дагы төө буурчак өндүрүп, Грузия мамлекетине Кыргызстандыкынан кыйла төмөн баада сатууда.
Төө буурчактын баалары дүйнөдөгү төө буурчак өндүргөн мамлекеттердин түшүмдүүлүгүнө көз каранды. Египет, Кытай, Аргентина, Өзбекстан, Кыргызстандан өндүрүлгөн төө буурчактын баасы Кытайдыкына жараша болот. Кытайда түшүмдүүлүк жогору болсо бизде баа төмөнүрөөк болуп калат. Иран мамлекетиндеги өнөктөштөр менен байланышсак алар доллардын курсу 48–50% өсүп кеткенин айтышууда. Ошол себептен доллар менен импорт кабыл алган аларга пайдалуу эмес. Бүгүнкү күндө кызыл өңдүү төө буурчак (скороспелка) 72–75 сомдон алынууда. Кызыл чаар төө буурчакты жылдын башында 90 сомдон алса, азыр баасы 65 сомго түшкөн.
