Ашхабадда мыйзамсыз валюта сатуу айыбы менен бир нече ишкер, банк жумушчулары жана улуттук коопсуздук кызматкерлери кармалышты. Бул тууралуу түркмөн кызматы бийлик түзүмдөрүндөгү өз булактарына шилтеме кылып кабарлады.
«Ашхабадда чет өлкөлүк валютаны мыйзамсыз алмаштыруу айыбы менен 10дон ашык ишкер жана 20дан ашык банк тармагынын жумушчулары кармалды. Ошондой эле бул иш боюнча каржы тармагын көзөмөлдөгөн улуттук коопсуздук кызматкерлери дагы жоопкерчиликке тартылат деп күтүлүүдө», — деди басылманын өз булагы. Анын айтымында, кармалгандардын арасында Улуттук коопсуздук министрлигинин Улуттук Банк менен Экономика министрлигин көзөмөлдөө башкармалыгынын жетекчиси жана ишкерлерге лицензия берүү бөлүмүнүн башчысы дагы бар.
Азырынча бул маалыматты расмий булактардан ырастоого мүмкүн болгон жок. Бирок кармоолор өлкөнүн улуттук коопсуздук министрлиги кызматтан алынган учурга туш келүүдө. Мамлекеттик басылмалар кабарлашкандай, президент Гурбангулы Бердымухамедовдун төрагалыгы алдында өткөн Коопсуздук кеңештин 13-июнундагы жыйынында күч түзүмдөрүнүн ишине баа берилип, бир нече орун алмашуулар жасалган.
Акыркы күндөрү Ашхабаддын «көмүскө базарларында» акча алмаштыруу кыйла кыйындап калды.
«14-июнда саат 11ге карата доллар сатуу дээрлик токтоду. Калк арасында ири өлчөмдө доллар саткан же үйүндө доллар менен ири сумма сактап жүргөн жемкорлор кармалганы айтылууда. Ошондой эле атайын кызматтын өкүлдөрү жарандык кийимчен базарларды аралап, валюта саткандарды кармай баштаганы кабарланууда. Мындан улам акча алмаштыргандардын көбү коркуп, ишин токтотуп коюшту», — деп жазды басылма.
