Президент Сооронбай Жээнбеков 11-январда Улуттук банктын төрагасы Толкунбек Абдыгуловду кабыл алды.
Анда Т.Абдыгулов Улуттук банк тарабынан туруктуу макроэкономикалык абалды камсыздоо, улуттук валютанын курсунун туруктуулугун сактоо, банк жана төлөм системаларынын коопсуздугун камсыздоо боюнча маалымат берди. Төрага ошондой эле банк жана төлөм системаларынын туруктуулугун камсыздоо үчүн жаңы мыйзам ченемдеринин күчүнө киргенин айтты.
«Бүгүнкү күндө Улуттук банктын резервдери 2 млрд 182 млн сомду түзөт жана келечекке ишенимдүү кароого мүмкүнчүлүк берет», — деп белгиледи Толкунбек Абдыгулов.
Президент Сооронбай Жээнбеков өлкөнүн каржылык-насыялык мекемелеринин туруктуу жана ишенимдүү аракетинин, улуттук валютанын туруктуулугун колдоонун маанисин айтты.
Мындан тышкары, Мамлекет башчысы банк тармагын өнүктүрүү, аймактарда банкоматтар менен ПОС-терминалдарды көбөйтүү жана накталай эмес төлөмдөрдүн үлүшүн көбөйтүүнү артыкчылыктуу багыт катары белгиледи.
Ошондой эле, пайыздык чендерди төмөндөтүү, доллардын колдонулушун чектөө, калкты узак мөөнөттүү насыялар менен камсыздоо боюнча мындан аркы иштерди улантуу талкууланды.
