Кыргызстандын тышкы карызы Россия Федерациясы тарабынан жоюла турган карызды эсептегенде 240 млн АКШ долларына кыскарат же башкача айтканда кыскаруудан кийин тышкы карыздын көлөмү ИДПга салыштырмалуу 53,6%ды түзөт. Бул тууралуу КРнын финансы министри Адылбек Касымалиев 2018-жылдын 2-февралында маалымат жыйынында билдирди.
А.Касымалиевдин айтымында, 2017-жылдын 31-декабрына карата Кыргыз Республикасынын тышкы карызы 4 млрд 81 млн АКШ долларын (280 млрд 905 млн сом) же ИДПга салыштырмалуу 56,9%ын түзөт.
Өз сөзүндө финансы министри 2018-жылдын 31-январында Россия Федерациясынын Федеративдик Кеңеши «Кыргыз Республикасына мурда берилген насыялар боюнча карызды жөнгө салуу жөнүндө Кыргыз Республикасынын жана Россия Федерациясынын Өкмөттөрүнүн ортосундагы келишимге протоколду ратификациялоо жөнүндө» Федеративдик мыйзамды кабыл алгандыгын билдирип, жакынкы күндөрү ал Россия Федерациясынын президенти тарабынан кол коюлса, Кыргыз Республикасынын тышкы карызы ИДПга салыштырмалуу 3,3%га кыскарат деди.
