9 айда КРнын ЕАЭБ өлкөлөрү менен болгон соода көлөмү 1 млрд 708,3 млн $ болду. Бул тууралуу Улуттук статистикалык комитеттин төрагасынын орун басары Б. Касымбеков билдирди.
“Кыргызстан менен ЕАЭБ өлкөлөрүнүн ортосундагы соода жүгүртүүсү 2016-жылдын январь-сентябрь айларына салыштырмалуу 11,6%га өскөн. Товарларды экспорттоо көлөмү 32,2%, ал эми импорт 5,8% жогорулаган”,-деди ал.
Сататкомдун маалыматына ылайык, Кыргызстан Орусия менен сооданы көп жүргүзгөн — 57,7%, Казакстан менен 40,1%.
ЕАЭБге болгон экспорт боюнча кендер жана баалуу металлдар концентраттары биринчи кезекте турат — 18,8%, кийим — 17,6%, бут кийим — 10,8%, сүт азыктары — 6,7%, кургатылган жемиштер — 4,7%, трактор жана унаа тетиктери 4%, айнек — 3,5%.
Жыл башынан бери Швейцарияга алтынды экспорттоо 436 млн$ болгонун Улуттук статистикалык комитетин соода боюнча статистика башкармалыгынын жетекчиси Венера Мамбеталиева билдирди.
“Үстүбүздөгү жылдын 9 айында Кыргызстандын тышкы соода айлануусунун көлөмү 4 млрд 424,4 млн$ болгон. Кендерди экспорттун көлөмү 15,8% жогорулаган, ал эми баалуу металлдар концентратын экспорттоо 27,5% жогорулаган. Алтын иштетилбеген же жарым жартылай иштетилген жана порошок түрүндө экспорттолот”,-деди Мамбеталиева.
