ЖКнын Бюджет жана финансы комитетинин мүчөлөрү Дүйнөлүк банктын Кыргызстандагы туруктуу өкүлү Болормаа Амгаабазар баштаган Аурельен Крузе, Саумя Митра, Мартин Негеле жана башка өкүлдөрү менен жолугушту.
Каржы уюмунун берген маалыматы боюнча, 1992-жылдан бери алар Кыргызстанды ар башка тармактарына 1.5млрд доллар инвестициялык долбоорлорду каржылаган. Алардын башкы милдети жакырчылыкты азайтуу экенин билдирди. Мындан тышкары Дүйнөлүк банктын Кыргызстандын учурдагы бюджетине, экономикалык абалына жана келечегине жүргүзгөн анализдери тууралуу баяндама жасалды.
Талкууда депутаттар Акылбек Жапаров менен Мурадыл Мадеминов Дүйнөлүк банк тараптан берилип жаткан жардамдарга ыраазылык билдирүү менен, бирок, донорлордон абдан көп келген каражат келгени менен, натыйжалуу колдонулбай жатканын белгиледи. Депутат Акылбек Жапаров иликтөөлөргө таянып, 2005-жылдарга чейин жакырчылыктын деңгээли азайганын, бирок андан бери бир орунда токтоп турганын айтты.
Дүйнөлүк банктын Кыргызстандагы өкүлүнүн айтканына караганда, 1990-жылдарда жакырчылыктын деңгээли 60 пайыз болсо, азыр 30 пайызды түзөт. Ал эми эл өкүлү Мурадыл Мадеминов Кыргызстандын калкынын 60 пайызы элетте айыл-чарбасы менен жашаганын эске алып, бул тармакка көп көңүл бурууну өтүндү.
Ошондой эле ал алдыңкы беш жылдык планга ирригациялык долбоорлор кирбегенин белгиледи.
Айыл чарбасын өнүктүрүү боюнча эл өкүлү Таалайбек Масабиров сөздү улап, каржылык уюм Ысык-Көл облусунда сүт тармагын өнүктүрүү боюнча долбоорду колдоп жатканына ыраазылык билдирди. Депутат 7 дубанда тең экспортко негизделген продукциялар бар экенин айтып, пропорцианалдуу түрдө бардык облустарда айыл-чарба долбоорлорун колдоону өтүндү.
Дүйнөлүк банктын өкүлдөрү мүмкүнчүлүгү жогору аймактарды иликтеп, кайрадан карап чыгарын айтышты.
