6-октябрда Өзбекстанда өткөн бизнес форумда 200 млн долларлык өнүмдү ташуу тууралуу келишимге кол коюлду. Бул тууралуу Экономика министрлигинин басма сөз кызматы билдирди.
Келишимдердин бирине ылайык, Өзбекстан чыгарып жаткан автобустар Кыргыз жеринде да куралып башташы мүмкүн. Ошондой эле айыл-чарба техникасы өндүрүлүп, кир жуучу машиналар куралат. Мындан сырткары дилерлик борборлор уюштурулуп, кабелдик өнүмдөр ташылып, Ош шаарында соода-көңүл-ачуучу борбор курулат. Кыргыз Республикасынын аймагында «Артель» техникалык мектебинин филиалы ачылат.
Мындай активдүү иштердин натыйжасында бир катар маселелер чечилери жана жумушчу орундар түзүлөрү күтүлүүдө. Өзбекстандын президенти Шавкат Мирзиёев тышкы экономикалык ишмердүүлүгүн активдүү жүргүзүүдө.
Унаа чыгаруучу фирмалар менен кызматташуу боюнча меморандумга кол коюлду жана Өзбекстанга дөңгөлөктөрдү, суу, бал, өсүмдүк майын, таш ташуу боюнча дагы сүйлөшүүлөр жүрдү.
Бизнес форумга министрликтердин, ведомстволордун, соода, инвестиция, өнөр-жай компанияларынын өкүлдөрү катышышты. Ага жалпысынан эки өлкөнүн 500дөн ашуун бизнесмендери дагы барган.
Эки тарапты тең кызыктырган негизги маселе эки өлкөнүн ортосундагы товар айланууну жогорулатуу болду. Ошондой эле мындан ары дагы кызматташуу үчүн приоритеттүү тармактар аныкталды.
