–Нарын районунда калктын саны жана жашоо-шарты кандай?
–Нарын районунда калктын саны жылдан-жылга өсүүдө. 2017-жылдын 1-январына карата жалпы калктын саны 49 миң 683 адамды түзүп, 10 миң 254 түтүн катталган. Калкыбыз негизинен мал чарбачылыгы менен алектенгендиктен, малдын башы өсүүдө, бодо малдар 61 миң башка, кой-эчки 240 миң башка чейин жетти. Акыркы 5 жылга салыштырганда бодо малдын саны 2 эсеге, майда жандыктар 20 миң башка көбөйгөн.
Райондогу 36 айылдын 28 айылында ичүүчү суу системасы курулган, элибиздин 83%ы ичүүчү суу менен камсыз болгон. Учурда бир айылда ичүүчү суу системасынын курулушу жүрүп жатат. Райондо 31 бала бакча, 8 үй-бүлөлүк дарыгерлер тобу, 28 ФАП, 34 мектеп элге кызмат кылат. Он үч айылдын ички жолдору асфальттанды. Дагы 3 айылда жалпы 5 чакырым ички жолду асфальттоо жүргүзүлөт.
-2017-жылдын башынан бери кандай иштер аткарылды?
–Ак-Кудук айыл аймагы райондогу эң алыскы аймак катары “Ага Хандын” “Эм Эс Ди Эс Пи Кей Джи” коомдук фондуна пилоттук аймак катары кирип, өнүктүрүү программасы иштелип чыкты. Эми ПРООНго Жерге-Тал айыл аймагы пилоттук аймак болуп киргизилди. Мунун алкагында 6 млн сомго чейинки долбоорлор ишке ашат.
Бүгүнкү күндө айыл өкмөттөр тарабынан 13 долбоор даярдалып, байкоочу кеңештин кароосунда турат.
–Нарын районунун экономикасын көтөрүү багытында кандай иштер жасалды?
–Ветеринардык клиникалардын курулушу 3 айылда бүткөрүү алдында турат, 4 айылда жерлери чечилип, каржылоо булактары аныкталды. Район боюнча 17 малды жасалма жол менен уруктаныдыруу пункттары ачылып, 4 жыл аралыгында “Лимузин” жана “Сементал” породасындагы 136 торпоктор алынды.Ошондой эле жыл башынан бери 21 жумуш ордун түзгөн, 6 ишкер субьект жаңы катталды. Булардын эсебинен жергиликтүү бюджетке 3,2 миң сом чегерилди. Өткөн жылы райондо өнөр жай продукциясын өндүрүү көрсөткүчү аткарылбай калган, жыл башынан бери Солтон-Сары кен казуу ишканасынын жетекчилиги менен өндүрүштү жандандыруу боюнча сунуштарды берип, 2017-жылдын 5 айында 107,1 пайыз жумуш аткарылып, өсүү темпи 134,7 % түздү.
-Кандайдыр бир кичи ишканалар барбы, болсо эмне иштетип чыгарат?
- Нарын районунда 3 нан азыктарын чыгаруучу кондитердик цех, 3 айылда сүт иштетүүчү цех, жүндү кайра иштетүүчү бир «Урмат Уз» кооперативи бар. Бул кооперативден улуттук колоритте даярдаган продукциялар чет өлкөгө чейин чыгат.
2016- жылдан бери 157 бал челектер ачылып, экологиялык таза бал өндүрүлө баштады.
Жашылча өстүрүүчү күнөсканалар 11 айылда курулган. Мындан тышкары 4 пескоблок чыгаруучу жана 2 айылда чийки кирпич чыгарган цехтер бар. Ошондой эле 6 айылда тоок ферма ачылган. Бүгүнкү күндө анын төртөө иштеп жатат.
–Райондо кандай жетишкендиктер жана кемчиликтер болууда?
–2017-жылдын 1-январына карата 1549 өтө жакыр үй-бүлө катталган, өткөн жылга салыштырмалуу 77 үй-бүлөгө кыскарган.
Билим алууга шарт түзүү багытында Эчки-Башы айылына 225 орундуу, Миң-Булак жана Орто-Саз айылдарына 150 орундуу мектептер, Эмгек-Талаа айылына 75 орундуу бала бакча курулууда. АРИСтин каржылоосу менен Кызыл-Жылдыз айылына 50 орундук бала бакчанын, 2 айылда ФАПтын курулушу жүрүп жатат. Ал эми кемчилиги сегиз айылда ичүүчү суу системасы жок, бала бакчалар жетишсиз.
-Нарын районунун экономикасын көтөрүү багытында, алдыда кандай пландар аткарылат?
–2017-жылы жалпы 8 ветклиниканы бүткөрүп, пайдаланууга беребиз. Жылдын аягына чейин жеке бизнести өнүктүрүү максатында 6 ишкер субьекти ачабыз.
