Экономикалык статистика жана улуттук эсептер башкармалыгынын башчысы Эльвира Исенкулованын билдирүүсүндө ушул жылдын январ-августунда, ички дүң продуктунун көлөмү алдын ала баалоолор боюнча, 282 миллиард сомдон ашып, өткөн жылга салыштырмалуу 6 пайызга жогорулаган.
Өнөр жай продукцияларынын көлөмү 2017-жылдын январ-августунда 144 миллиард сомду түзүп, мурунку жылдын ушул мезгилине салыштырмалуу 26,4 пайызга жогорулады.
Өнөр жай өндүрүшүнүн көлөмдөрүнүн өсүшү негизги металлдарды өндүрүүнүн, резиналык жана пластмассалык жасалгаларды, тазаланган мунайзат продуктуларын жана кийим өндүрүүнүн жогорулоосу менен камсыздалган.
Анын ичинде Евразия экономикалык биримдигине мүчө-мамлекеттер менен болгон сооданын көлөмү дагы 14,4 пайызга жогорулады. Тактап айтканда, экспорт 32,7 пайызын түзсө, импорт 9 ‚8 пайызды гана көрсөтүүдө. Бул тууралуу статистика комитетинин тышкы соода–сатык бөлүмүнүн башкы адиси Гүлайым Шайахметова тааныштырып өттү.
Биримдик ичиндеги беш мамлекеттин арасында Кыргызстандын көрсөткүчү жогору саналса, кайсы товарларды алып сатуу жүрүп жатат?
Бул боюнча Шайахметова төмөнкүлөрдү кошумчалады.
Уюмга мүчө мамлекеттер менен соода өстү делгени менен өлкөдөн чыккан эмес, дагы деле кирген товар басымдуулук кылып жатат. Мунун негизги себебин экономисттер Кыргызстанда өндүрүштүн жоктугу менен байланыштырат. Экспортту көтөрүү үчүн өндүрүшкө көңүл буруу керектигин айтышып, ошол эле учурда экологияга зыян алып келбегендей болууга тийиш дешет. Ошондуктан сапаттуусуна кароо зарыл. Эгерде өнүм сапаттуу болсо, өлкө дагы өнүгөт. Андыктан өлкөгө кирип жаткан чийки заттын баасын түшүрүү керек болот. Ошонда ЕАЭБ мамлекеттери менен атаандаша алат.
Буга чейин экс-премьер-министр Сооронбай Жээнбеков өлкөнүн экспортун өстүрүү жаатында жаңы мамлекеттик программа түзүлүп жатканын айткан. Ошондой эле өкмөт жергиликтүү ишкерлерге каржылык колдоо көрсөтүү тууралуу пикирин айтканы да бар. Бирок азырынча бул убадалар иш жүзүнө өтө элек.
