Бүгүн, 22-январда өкмөт башчы Сапар Исаков баштаган делегация Бүткүл дүйнөлүк экономикалык форумга катышуу үчүн Давоско жөнөп кетти. Бул тууралуу өкмөттүн маалымат кызматы билдирди.
Экономикалык форум 23-январда Швейцариянын Давос шаарында өтөт. Форумдун алкагында премьер-министр Исаков башка өлкөлөрдүн жетекчилери менен жолугушат.
Давос форумуна быйыл 60тан ашык өлкөнүн жетекчилери, 1000ден ашык эл аралык уюмдун өкүлдөрү катышат. 48-жолу өтүп жаткан Бүткүл дүйнөлүк форумда дүйнөнүн келечеги талкууланат.
Делегациянын курамында Кыргызстандын Швейцариядагы атайын жана ыйгарым укутуу элчиси Данияр Мукашев, Премьер-министрдин кеңешчилери Талант Султанов жана Гүлнура Торалиева, Өкмөт Аппаратынын эл аралык кызматташтык бөлүмүнүн башчысы Айбек Айдарбеков жана «Кыргызтелеком» ААКнын Директорлор кеңешинин төрагасы Азиз Солтобаевдер бар.
