Салык органдарына бир дагы отчёт бербеген ишканага кылмыш иши козголду. Бул тууралуу Экономикалык кылмыштарга каршы күрөшүү боюнча мамлекеттик кызматынын маалымат кызматы билдирди .
Маалыматка караганда, 2017-жылы Бишкек шаарында каттоодон өткөн ишкана Кытайдан товар ташуу менен алектенип келген. Текшерүү учурунда ал бир дагы жолу салык кызматына отчёт бербей, жалпысынан өлкө казынасына 7 млн. 543 миң 312 сом төлөбөгөндүгү аныкталган. Бирок ишкананын ээси катары катталган жаран суракка чакырылганда ал ишкердик менен алектенбей турганын билдирип, аны каттоого да катышпаганын айткан. Бул факт боюнча Кылмыш-жаза кодексинин жалган ээлик кылуучулук беренесинин негизинде кылмыш иши козголду. Учурда буга катыштыгы бар адамдарды аныктоо боюнча чаралар жүрүп жатат.
