Казакстандыктар сүт азыктарын аз сатып ала башташты. Өзгөчө коюлтулган сүт, йогурт, сыр жана быштак сатып алгандардын саны азайды.
Казакстандык өндүрүүчүлөр республикада сүт азыктары аз өтө баштагандыктан аларды өндүрүү көлөмүн азайтышкан. Үстүбүздөгү жылдын 9 айында сүт азыктарын чыгаруучу ишканалар былтыркыга салыштырмалуу 2%га аз азык чыгарышкан. Бирок сүт азыктарынын баасы 17,9%га жогорулган.
Сүт өндүрүшүндөгү жайлап калган процесстер рынокко орусиялык ишканалардын кирүүсү менен байланыштуу болуусу мүмкүн экенин айрым эксперттер айтып келишет. Себеби кыргыз сүт азыктарын алып кирүүгө тыюу салынган.
Белгилей кетсек, казакстандыктар быйыл сыр жана быштактарды — 3,5%, коюлтулган сүттү жана каймакты — 6,5%, йогурт жана сүттөрдү 5,1%га аз сатып алышкан.
Ал эми кайра иштетилген сүттү сатуу 0,7%га жогорулаган, былтыр бул көрсөткүч 2,2% болчу, ал эми каймак сатуу былтыр 8,5%га жогоруласа быйыл болгону 2,9%ды түзгөн.
Бирок кургак сүттү колдонгондордун саны бир топ жогорулаган. Үстүбүздөгү жылы аны сатуу 17%га жогорулаган. 2016-жылдын январь-август айларында көрсөткүч 10% болчу.
Эске сала кетсек, Казакстанда сүт азыктарынын баасы 30–40% жогорулады.
