Кыргыз-орус соода-экономикалык, илимий-техникалык жана гуманитардык кызматташтык боюнча өкмөт аралык комиссиянын 20-жыйынында тиешелүү органдарга Кыргыз Республикасынан келген адистерди Россиянын жогорку билим берүү уюмдарында Россиянын каржылык колдоосу менен окутууну улантуу тапшырмасы берилди.
Жыйындын натыйжасында кыргыз-орус өкмөт аралык комиссиянын төрагалары эки тараптуу маселелерди чечүү тууралуу жыйынтыктоочу Протоколго кол коюшту.
Мындан тышкары Кыргыз Республикасы менен Россия Федерациясынын өкмөтү ортосунда 2018–2021-жылдарга карата экономикалык кызматташтык Программасына кол коюлду. Бул программа соода, инвестиция, отун-энергетикалык комплекси, транспорт жана транспорттук коммуникация, санарип экономика,байланыш, ден-соолукту коргоо жана аймактар аралык кызматташтык багыттарында кызматташууну өнүктүрүүгө жана кеңейтүүгө багытталган.
Аны менен катар эле Чынгыз Айтматовдун чыгармаларынын негизинде тартылган тасмаларды кыргыз тарапка белекке берүү чечими кабыл алынды. Ошондой эле орус тарап Ысык-Көл форумуна жана үчүнчү Дүйнөлүк көчмөндөр оюнуна чыгармачыл топтон турган делегация жиберүүгө даяр экенин билдирди.
Жыйын соңунда өкмөт аралык комиссиянын кезектеги жыйыны 2019-жылы Кыргызстанда өтөрү макулдашылды.
