Өкмөт үйүндө 2018-жылдын 16-мартында Кыргыз Республикасынын Президентинин «2018-жылды Региондорду өнүктүрүү жылы деп жарыялоо жөнүндө» Жарлыгын ишке ашыруу боюнча топтун кезектеги жыйыны болуп өттү. Жыйында күн тартибинин негизги маселеси катары бийлик бутактарынын милдеттерин талкуулоо болду.
Кыргыз Республикасынын вице-премьер-министри Санжар Муканбетов Жогорку Кеңештин депутаттары, президенттик аппараттын, донордук уюм өкүлдөрү жана чакырылгандар үчүн баяндама жасады.
Өз баяндамасында вице-премьер-министр аталган Жарлыкты ишке ашыруунун баскычтарын белгиледи. «Биринчи этапта региондорду өнүктүрүү, региондорду өнүктүрүү статусу, региондорду өнүктүрүү наркы деген эмне экендигин аныктоочу параметрлер такталат. Бардык параметрлер мамлекеттик стандарт, курулуш нормалары жана эрежелери, санитардык – эпидемиологиялык нормативдер жана эрежелер сыяктуу жетекчиликке алынчу документтерде аныкталган. Мисалга, аларга калктын жан башына сууга карата нормативдери, мамлекетик стандарт боюнча жашоо аймактарынын параметрине карата жол катмарынын катышы, турак-жай менен камсыздалышы ж.б.кирет», — деп маалымдады баяндамачы.
Экинчи этапта көрсөткүчтөр маалыматы жер-жерлерде жергиликтүү өз алдынча башкаруу органдары тарабынан такталат. Жергиликтүү өз алдынча башкаруу органдарынын милдеттери үстүбүздөгү жылдын 6-мартында Ош шаарында өткөн Өкмөттүн уюштуруу комитетинин көчмө жыйынында белгиленген. Баяндамачынын айтымында, бул маалыматтар Экологиялык жана техникалык коопсуздук боюнча мамлекеттик инспекция, Санэпидемстанция жана башка контролдоо-көзөмөлдөөчү органдар тарабынан тастыкталат.
«Үчүнчү этапта ар бир параметр боюнча чогулган көрсөткүчтөрдүн негизинде аларды каржылоо көлөмү эсептелип, бюджетти программалаштыруу жүргүзүлөт. Талап кылынган көлөм такталып жана ар тараптуу талдоолордон соң, артыкчылыктар белгиленет», — дейт вице-премьер-министр.
Кийинки этап диспропорцияларды жоюу үчүн финансы-экономикалык инструменттерди аныктайт, анын катарына мамлекет тараптан салыктык жана фискалдык чаралар, экономикалык демилгелер кирет. “Буга байланыштуу аталган этапта Өкмөттүн күч-аракетин колдоого алуу үчүн Жогорку Кеңештин депутаттарынын демилгелери зарыл”,- деп белгиледи С.Муканбетов.
Тактап айтканда, региондорду өнөр-жай боюнча өндүрүү үчүн “Өнөр-жай жөнүндө”, “Жылуулук энергетикасы жөнүндө”, “Кластерлер жөнүндө” мыйзамдардын кабыл алынышы, ошондой эле Жарлыктагы милдеттин талаптарын эске алуу менен бюджетти программалаштырууну жаңыртуу актуалдуу. Катышуучулар Жарлыкты ишке ашыруу боюнча Өкмөттүн ыкмасынын методологиясын жана пландык долбоорлорун жактырышты.
