Бишкектин Жылуулук электр борборуна (ЖЭБ) байланыштуу төрт кылмыш иши козголгон, алар толук, объективдүү жана ар тараптуу тергелүүдө. Бул тууралуу бүгүн парламентте маалымат берип жатып башкы прокурордун орун басары Нурлан Дүйшөмбиев билдирди:
- Убактылуу депутаттык комиссиянын корутундусу жана палатанын жыйынынын стенограммасы менен чечими кылмыш ишине тиркелет. Ошол боюнча тергөө жүрүп, укуктук баа берилет. Кылмыш иши Кыргыз Республикасынын жазык-процессуалдык мыйзамдарынын алкагында тергелип жатат. Толук, объективдүү жана ар тараптуу. Бишкек ЖЭБинин айланасында төрт кылмыш иши козголуп, тергелүүдө. УКМКнын Башкы тергөө башкармалыгында тергөө тобу түзүлдү. Кылмыш ишин тергөө кыйсы багытта жүрөрүн тергөө тобу аныктайт.
Жогорку Кеңеш бүгүнкү сессиясында ЖЭБдеги авариянын себебин жана аны модернизациялоого жумшалган 386 миллион доллар Кытай насыясынын чоо-жайын иликтеген депутаттык комиссиянын корутундусун талкуулоону улантып жатат.
Эл өкүлдөрүнүн суроолоруна мурдагы өкмөт башчылар Жантөрө Сатыбалдиев, Темир Сариев, Сапар Исаков жана башка жетекчилер жооп берүүдө. Комиссия 30га жакын аткаминердин фамилиясы жазылган корутунду чыгарган болчу.
Быйыл кыш чилдеде ЖЭБ бузулуп, Бишкек бир нече күн жылуулуксуз, бир топ жери жарыксыз калган. Буга байланыштуу кылмыш иши козголгон.
«Аварияга жана жемкорлукка айыптуу» деген тарап күнөөсү жок экенин, Кытай тарап менен келишим мыйзам чегинде иштелип чыгып, кабыл алынганын айтууда.
