25-апрелде Кытайга болгон расмий иш-сапары учурунда Тышкы иштер министри Эрлан Абдылдаев КЭРдин мамлекеттик кеңешинин мүчөсү, КЭРдин Тышкы иштер министри Ван И менен жолугушканын КРнын Тышкы иштер министрлиги билдирди.
Расмий сүйлөшүүлөрдүн жүрүшүндө тышкы иштер министликтеринин жетекчилери кыргыз-кытай мамилелеринин абалы жана эки тараптуу стратегиялык өнөктөштүк мамилелерин активдештирүү тууралуу маселелерди талкуулашты.
Жолугушуунун негизги темасы Кыргыз Республикасынын Президенти Сооронбай Жээнбековдун КЭРге боло турган иш сапары болду. Өлкө башчысы КЭРге ШКУнун жыйынына катышуу үчүн барат. Мындан сырткары, министрлер буга чейин болгон ШКУнун тышкы иштер министрлеринин жолугушуусунун натыйжаларына көңүл бурушту.
Эрлан Абдылдаев белгилегендей, кыргыз тарап Кытай менен стратегиялык өнөктөш болууга өтө чоң маани берерин билдирип, Кыргызстан кызматташуу багытын мындан ары дагы өнүктүрүүгө даяр экенин кошумчалады.
Министр Ван И Кытай менен Кыргызстандын ортосунда дипломатиялык мамилелер түзүлгөндөн бери эки тараптуу өнөктөштүк тиешелүү багытта өнүгүп жатканын белгиледи. КЭРдин ТИМинин башчысы кыргыз-кытай мамилесин колдоону уланта турганын кошумчалады.
Эки тараптуу мамилелердин өнүгүүсүндө чоң салым кошокону үчүн Тышкы иштер министри Э.Абдылдаев КЭРдин Тышкы иштер министри Ван Иге КРнын ТИМинин “Эл аралык кызматташтыкты бекемдегени үчүн” медалын тапшырды.
