Президент Сооронбай Жээнбеков өкмөт башчыны отставкага кетирүү боюнча буйрукка кол койду. Бул тууралуу өлкө башчынын маалымат кызматы кабарлады.
Жарлыкка ылайык, өкмөттүн жаңы курамы түзүлгөнгө чейин премьер-министр, вице-премьер-министрлер жана башка өкмөт мүчөлөү ээлеген кызматына ылайык, милдеттерин аткарууну улантышат.
Жарлык кол коюлган учурдан баштап күчүнө кирет.
Бүгүн, 19-апрелде Жогорку Кеңештин «Республика — Ата Журт» фракциясынын лидери Жыргалбек Турускулов өкмөткө ишеним көрсөтпөө маселесин күн тартибине киргизүүнү сунуштаган. Конституциялык мыйзамдар, мамлекеттик түзүлүш, сот-укуктук маселелер жана Жогорку Кеңештин Регламенти боюнча Комитети сунушту колдоду.
Кийин парламент депутаттары өкмөт башчы Сапар Исаковго ишеним көрсөтпөө боюнча тармактык комитеттин чечимин колдошту. Анын отставкасы үчүн 101 депутат макул, 5 эл өкүлү каршы болду.
Сапар Исаков өкмөт башчылыкка 2017-жылдын 25-августунда дайындалган.
