«Макмал» алтын кенинде запастардын түгөнгөндүгүнө байланыштуу кен жабылып калуу коркунучунда турат. Бул тууралуу «Кыргызалтын» ААК башкармалыгынын төрагасы Алмаз Алимбеков премьер-министр Мухаммедкалый Абылгазиев менен жолугушкан учурда билдирди.
Алимбеков маалымдагандай, запастардын түгөнүүсүнө байланыштуу кендин автоматтык түрдө жабылуусу күн тартибине чыгууда.
Учурда “Макмалалтын” кени биринчи кезекте Тогуз-Торо районунун бюджетин 95 пайыз камсыздаган жана миңден ашуун жумушчу ордун түзгөн социалдык объект болуп саналат.
Өкмөт башчы Мухаммедкалый Абылгазиев «Макмалалтын» кенинин социалдык багытын эске алуу менен анын ишин узартуунун маанилүүлүгүн белгилеп, аны иштетүү боюнча сунуш киргизүүнү тапшырды.
