Ошто жарандардан келген көптөгөн кайрылуулардан соң мэриянын, шаардык кеңештин, КРнын Өкмөтүнүн алдындагы монополияны жөнгө салуу бөлүмүнүн, ветеринардык кызматтын өкүлдөрүнүн жана соодагерлердин катышуусунда жыйын өттү.
Ош шаарынын биринчи вице-мэри Замирбек Аскаровдун айтымында, Ош шаарында эттин баасы облустагыга салыштырмалуу бир топ жогору болуп жаткандыктан шаардыктар арыз менен кайрылышкан.
“Ошто эттин бир килограммы 330 сом болууда. Бул Ош облусунун башка шаарларына салыштырмалуу жогору. Тургундар эттин баасын көзөмөлдөөнү суранып кайрылышкан. Жергиликтүү өз алдынча башкаруу органынын өкүлдөрү катары биз жарандардын кайрылуусун көз жаздымда калтырбашыбыз керек. Этке болгон баанын жогору болуп жатканына байланыштуу монополияга каршы кызматы баардык чыгымдарды эсептеп чыккан. Мониторингдин натыйжасында Ошто эттин килограммын 311 сомдон сатса болору белгилүү болгон. Мамлекеттик орган соодагерлердин дагы пайдасын кошо эсептеген жана этке болгон бааны 311 сомго түшүрүүнү сунуштоодо. Мен эттин баасын килограммына 315 сом кылууну сунуштайм”,-деди Аскаров.
Ал эми соодагерлер ар кайсы райондо этке болгон баа ар кандай экенин билдиришип, жыйындын натыйжасында соодагерлер бир килограмм этти 315 сомдон сатуу сунушун колдошту.
Монополияга каршы кызматка жана башка тиешелүү кызматтарга токтомду түшүндүрүү тапшырмасы берилди.
