Кыргызстандын Бажы кызматкерлери Пакистандан алынып келе жаткан дээрлик 2 тонна аткезчилик мандаринди ачыкташты. Бул тууралуу Мамлекеттик бажы кызматынын басма сөз кызматы кабарлады.
Маалыматка ылайык, атайын жүргүзүлгөн иш-аракеттердин жыйынтыгында Ош шаарынын Жапалак айылынын аймагында “Түштүк” ыкчам бажы кызматынын кызматкерлери тарабынан “Б.А”, аттуу жаран башкарып бара жаткан “Мерседес-Бенц Спринтер” үлгүсүндөгү унаа токтотулган.
Текшерүү маалында унаанын ичинде 1 миң 814,5 кг, жалпы суммасы 117 миң 942,50 сомду түзгөн мандарин табылган.
Чогултулган материалдар Ош облусунун прокуратурасына өткөрүлүп берилди.
