Ош шаарынын борбордук базарында соода контейнерлеринин биринен өрт чыгып, коңшу соода жайларын каптап кетти. Бул тууралуу Өзгөчө кырдаалдар министрлигинен кабарлашты.
Өрт кызматына бүгүн эртең менен саат 07:50дө өрт чыккандыгы тууралуу маалымат түшкөн. Бир мүнөттөн кийин эле Ош шаардык №12 аскерлештирилген өрт-куткаруу бөлүмүнөн бир бөлүм, он мүнөттөн кийин дагы бир бөлүм тартылган. Натыйжада өрт саат 08:37де толугу менен өчүрүлгөн.
Учурда өрттүн келип чыгуу себебин аныктоо иштери жүргүзүлүүдө.
Ош шаардык ички иштер башкармалыгынын маалымат кызматы билдиргендей, бул факт боюнча милиция да иликтөө иштерин алып бара баштады.
