Ош шаарында 7 миң киши иштей турган тигүү фабрикасы курулат. Бул тууралуу Ош мэриясынын басма сөз кызматы билдирди.
21-февралда шаар мэри Айтмамат Кадырбаев текстиль фабрикасын куруу долбоорун ишке ашыруу максатында бир нече мекеме-ишкана жетекчилери менен биргеликте Кең-Сай айылына барды. Анын айтымында, Кең-Сай массивинен фабрика үчүн 25 гектар жер бөлүп берилген. Фабриканы куруу долбоорун “Кыргыз Текстиль ЛТД” жоопкерчилиги чектелген коому ишке ашырмакчы.
Ага улай, шаар мэри Айтмамат Кадырбаев Манас-Ата аймактык кеңешине барып, “ЖБИ-20” өндүрүш ишканасынын курулуш пландары менен таанышты.
Аталган ишкана келечекте мембрана пакетин жана эт азыктарын кайра иштетүүчү фабрика болот. Ошондой эле, ишкана Россия-Кыргыз өнүктүрүү фонду тарабынан каржылана тургандыгы белгилүү болду.
