Кыргызстанды туруктуу өнүктүрүү стратегиясынын Улуттук кеңешинин катчылыгына Стратегия-2040 долбооруна өзгөртүү киргизүү боюнча жалпы коомчулуктан 80 чакты сунуштар келип түштү. Бул тууралуу Улуттук кеңештин катчысы Нурсулу Ахметова 22-январда Президент Сооронбай Жээнбеков менен жолугушууда билдирди.
Жолугушууда «Таза Коом. Жаңы Доор» 2018–2040-жылдары Кыргыз Республикасын туруктуу өнүктүрүүнүн Улуттук стратегиясынын долбоору талкууланды.
Нурсулу Ахметова узак мөөнөттүү Стратегиянын долбоорун иштеп чыгуу, кеңири коомдук талкууну эске алуу менен жүргүзүлүп жатканын Президентке билдирди.
Мисалы жарандык коом менен тыгыз байланышта болуу максатында 2018–2040-жылдары Кыргызстанды туруктуу өнүктүрүүнүн Улуттук стратегиясынын (Стратегия-2040) текстине сунуштарды жана ой-пикирлерди топтоочу электрондук система түзүлгөн.
Андан тышкары, Улуттук кеңештин эксперттери өлкөнүн аймактарында, ар кандай кесиптик жамаат чөйрөлөрүндө талкууларды өткөрүшүп, ишкердик жана эл аралык уюмдардын өкүлдөрү менен бир нече жолугушуулар уюштурулган. Анын натыйжасында 80 чакты сунуш келгенин, алардын ойлору стратегияны иштеп чыгууда эске алынаарын Нурсулу Ахметова кошумчалады.
