Өткөн жылы Кыргызстандан ЕАЭБ аймагына жөнөтүлгөн жашылча-жемиштин экспорту 157 млн долларды түздү. Бул тууралуу Айыл чарба, тамак-аш өнөр жайы жана мелиоарация министри Нурбек Мурашев Жогорку Кеӊештин “Республика – Ата Журт” фракциясынын жыйынында билдирди.
Буга чейин көбүнесе сүт азыктары экспорттолуп келсе, май айынан тарта жашылчалар жөнөтүлө баштады. Мисалы, 2017-жылы жашылча-жемиштин экспорту 157 млн долларды түздү, анын ичинде 74 млн доллар көлөмүндөгү товар Казакстанга, калганы Орусияга жөнөтүлгөн.
Депутат Умбеталы Кыдыралиев Евразия экономикалык биримдигинин 18 техникалык регламентин ишке ашыруу боюнча суроо узатты.
Министрдин айтымында, Кыргызстан 2015-жылы ЕАЭБ курамына кирип жатканда, ЕАЭБдин 13 техрегламентин тезинен ишке ашыруу тапшырмасы берилген. Казакстан Кыргызстанга 8 лаборатория куруп бермек, бирок ал келишим ишке ашырылган жок. Ошондон улам, алардын курулушу 2018-жылдын бюджетине киргизилген.
Бүгүнкү күндө Бишкек жана Ош шаарларында эки ири лаборатория, ошондой эле Талас, Ысык-Көл облустарында чакан лабораториялар иштөөдө.
