Москвадагы «Перекресток» супермаркетинде “Кыргыз товарлар күнү” өткөрүлдү. Ага Кыргыз Республикасынын Экономика министри Артем Новиков жана Россия Федерациясынын Экономикалык өнүгүү министринин орун басары Илья Торосов катышты. Иш-чара соода-экономикалык, илимий-техникалык жана гуманитардык кызматташтык боюнча кыргыз-орус Өкмөттөр аралык комиссиясынын 20-жыйынынын алкагында өткөрүлдү.
Бул акция Кыргыз Республикасы менен Россия Федерациясынын ортосундагы соода-экономикалык кызматташтыкты практика жүзүндө ишке ашыруу багытынын бири болуп саналат.
Иш-чара Россия Федерациясынын соода тармактарында кыргыз өнүмдөрүн жайылтуу жана сатып алуучуларды экологиялык жактан таза жана арзан баадагы кыргыз товарлары менен тааныштыруу максатында өткөрүлдү. Акция алкагында «Перекресток» супермаркетине келген ар бир сатып алуучу Кыргызстандын өнүмү тууралуу маалымат алып, аны ооз тийүү мүмкүнчүлүгүнө ээ болушту. Анда Кыргыз Республикасынын аймагында өндүрүлгөн айыл-чарба өнүмдөрү жана азык-түлүктөр коюлуп, 30га жакын өндүрүшчүлөр катышышты.
Эске сала кетсек, 2017-жылдын 15-декабрында Бишкекте алтынчы кыргыз-орус аймактар аралык конференциясы өткөн. Иш-чаранын жүрүшүндө КРнын Экономика министрлиги менен РФнын X5 Retail Group деп аталган белгилүү соода тармагы ортосунда келишимге кол коюлган. Анда аталган соода тармагы дүкөндөрүндө сатуу үчүн кыргыз өнүмүн алууну көздөп жатканын билдирген болчу.
